Памёр 50-гадовы спецназавец, які ўдзельнічаў у выкраданні і забойстве Захаранкі і Ганчара

Адзначаецца, што ён служыў у в/ч 3214, быў камандзірам групы Спецыяльнага атрада хуткага рэагавання і меў крапавы берэт.

Уладзімір Буцько — адзін з тых людзей, чыё імя як удзельніка забойстваў апазіцыйных палітыкаў назваў спецназавец Юрый Гараўскі.

У канцы 1990-х Гараўскі служыў у Спецыяльным атрадзе хуткага рэагавання і сам прымаў удзел у выкраданні і забойстве экс-міністра ўнутраных спраў Юрыя Захаранкі, экс-кіраўніка Цэнтрвыбаркама Віктара Ганчара і бізнэсмена Анатоля Красоўскага.

Гараўскі назваў імёны адзінаццаці спецназаўцаў, якія ўдзельнічалі ў захопе Захаранкі: Паўлючэнка, Карповіч, Шкіндзераў, Кажэўнікаў, Панкоў, Румянцаў, Наватарскі, Балынін, Будзько і Буцько. А таксама сам Гараўскі.

Забойцаў Красоўскага і Ганчара было дзесяць.

З Буцько і Будзько ёсць блытаніна, бо Гараўскі пазначаў абодвух як БуДЗько. Але ў іх розніца ў імёнах — Юрый Будзько і Уладзімір Буцько.

Па словах Гараўскага, Уладзімір Буцько займаўся знішчэннем аўтамабіля Анатоля Красоўскага. Пад Бегомлем выкапалі яму на прасёлкавай дарозе: «Там такая старая прасёлкавая дарога, проста на ёй была выкапана яма. На наступны дзень Буцько Уладзімір і кіроўца БТРа — салдат-тэрмінавік — узялі машыну Красоўскага і загналі яе туды. БТРам раздушылі гэты джып і закапалі».

Гараўскі і Уладзімір Буцько былі фігурантамі крымінальнай справы аб вымагальніцтве — па просьбе Паўлічэнкі спрабавалі забраць $25 тысяч у людзей, якія нібыта былі вінныя яму гэтыя грошы.

Аднак тыя напісалі заяву ў міліцыю. У выніку Буцько атрымаў тры гады хіміі, Гараўскі — чатыры.

Развітанне са спецназаўцам праходзіла ў вёсцы Вуглы Барысаўскага раёна.